Januarie het ’n nuwe fase vir die bou van die Akademia-kampus begin. Ná die grondwerke en die simboliese sooispit, begin die fase wat minder sigbaar is, maar die meeste gewig dra: die lê van fondasies.

Vyf van die geboue in die akademiese nodus skop nou af. Hul fondasies sal tussen Januarie en April voltooi word. Daarna volg die koshuise, waarvan die fondasies tussen Februarie en Julie gelê word. Dit is presiese werk. Stadige werk. Werk wat nie indrukwekkend lyk nie, maar waarop alles wat nog verrys, sal staan.

’n Fondasie is meer as beton en staal. Dit is ’n besluit. Dit is die keuse om nou die diepte reg te kry sodat die hoogte later kan volg. ’n Fondasie is ’n toekomsbelofte.

Mense sien graag die voltooide gebou. Die dag wanneer die deure oopgaan. Wanneer studente instap en die ruimtes begin vul. Wat minder sigbaar is, is die maande se voorbereiding daaronder: die grond wat uitgegrawe word, die staal wat vasgevleg word, die beton wat sorgvuldig gegiet word.

Hierdie fase vra dissipline en vakmanskap. Kanton werk saam met JC van der Linde en Venter Bouers as hoofkontrakteurs, dieselfde span wat die Sol-Tech-kampus betyds en onder begroting voltooi het, selfs te midde van die uitdagings van Covid-19. Daardie projek het getoon wat moontlik is wanneer deeglike beplanning, ervaring en verantwoordelikheid saamwerk.

Fondamente word nie gehaas nie. Hulle word gemeet, weer gemeet, en doelbewus gelê. In Matteus 7 word die beeld gebruik van ’n huis wat op die rots gebou is. Wanneer storms kom, bly dit staan, nie omdat dit hoog is nie, maar omdat dit ten diepste geanker is.

Die Akademia-kampus word met dieselfde ingesteldheid ontwikkel. Hierdie fondasies dra meer as strukture. Hulle dra die vooruitsig van studente wat hier sal leer en vorm. Hulle dra leefruimtes vir Afrikaans wat professioneel en volhoubaar gevestig word. Hulle dra ’n vennootskap tussen kultuur en kapitaal wat daarop gerig is om iets te bou wat langer as ’n enkele geslag sal hou.

Wat nou onder die grond gebeur, is nie ’n oorgangsfase nie. Dit is die fase waarop  alles gaan staan.

Elke blywende bouwerk begin hier. Diep. Deurdag. Op rots.